Tuisakapur Biak In sak zawh a ni ta.

Kan Kohhran Ramthar Committee Hmalakna in Tripura, Tuidu Bial a awm Tuisakapur Biak In sak zawh a ni ta.

Kan Kohhran Ramthar Committee bultum a Tripura, Tuidu Bial a Tuisakapur Biak In sak chu zawh fel a ni ta. Tuisakapur khua hian Pathian Biak In an la nei lova, kan kohhran atanga missionary a helai bial a awm Pu Ramchhanngama hnen atangin Biakin an neih loh thu hriat a ni a. Ramthar Committee in ngaihtuahin Biakin sak sak tha a ti a, nikum khan Biakin hmun laiin work camp zuk neih a ni tawh a, kumin ah chhunzawm leh in Tuisakapur khua te hian tunah chuan Pathian biakna tur Biakin tha tak kan kohhran Ramthar committee hmalakna in an lo nei thei ta. Pathian hnenah lawmthu i sawi ang u. Work camp report:
Tuisakapur Biakin sa tur hian Ni 5.3.2013 zing khan Pu R.Lalhlira motor-in mi 14 Upa Lalvena, Pu Ronihtlinga, Pu Lalhmachhuana, Pu V Lalbiaktlinga, Tv Lalhmasaa, Pu Bawihhnuna, Pu Arsithanga, Pu H Lalfakawma, Pu Chhuanliana, Pu Zoremmawia, Pu K Lalremruata, Pu C Laldingliana, Pu R Liankunga leh Pu Lalhmangaih tluanga te an kal a. Tuidam ah riak thla in nilai tlai dar 3:30 ah Tuidu mission field an thleng a, hetah hian an innghat nghal a ni. Ningani tukthuan eikham atangin Biakin sak hna hi an tan nghal a. Biakin sakna hmun hi an thlenna atang hian an motor ken in an kal thin  a, nimin inrinni khan Biakin sak hna hi an zo fel a, electric wiring pawh an ti nghal vek a ni. An Biakin zuk sak hi a dung 36ft, a vang 18ft a zau niin a chung leh a bang rangva vek a ni a, a ban leh bangrel zawng zawng ah thing hman niin a skirting chin ah leirawhchan hman a ni. Kawngkhar pahnih leh tukverh pariat neiin  tukverh ah hian thingphel hman a ni. Signboard pawh mawi takin Pu H Lalfakawma’n a ziak zo nghal bawk. Tuisakapur kohhran ho te pawh an lawm hle a ni. He Biakin sak nan hian tha bakah Rs 1,40,000 chuang hmanral a ni.
Pulpit, Maicham leh a thutthleng ve ve te mawi taka siam sa in helai hmun  atangin an keng thla a. Pu Laldinsanga’n mawi takin rawng a kahsak a, an lawm hle. Heng zawng hi Pavalai Pawl tum a ni.
Naktuk thawhtanni hian Tripura khawpui Agartala an fang ang a, thawhlehni ah an lo haw ang a, nilai ni ah an lo thlen beisei a ni. Kohhran hote a thei a piangin lo hmuak thei ila a lawmawm hle ang
Vawiin chawhma ah hian Tuisakapur Biakin an sak thar ah chuan an va inkhawmphei ang a, Upa Lalvena’n thu a sawi ang a, chawhnu lam chu Tuidu mission field ah an inkhawm ang a, Upa Lalvena’n thu a sawi leh ang. tlaiah Pu Ramchhan ngama’n zanriah a buatsaih sak dawn a ni. Zan ah Tuisakapur-ah an va inkhawm phei leh ang a Pu V Lalbiaktlinga’n thu a sawi ang.
He Biakin kan kohhran Ramthar committee ten an sak theihna tura tha thawh tu zawng zawng leh thilpek petu zawng zawng te chungah   Ramthar committee in lawmthu a sawi mawlh mawlh a ni.