GROUP ZAIPAWL KAN KALPUI DAN

GROUP ZAIPAWL KAN KALPUI DAN

Khawzawl Venglai Branch K.T.P te hian hun rei deuh tawh atang kan Group Meet/Sports kan hmang thin a, he hunah hian Item pakhat atan Goup Zaipawl intihsiakna neih thin a ni a, kan intihsiak phung hi a tha viau niin ka hria a, that lohna pawh a nei tho awm e. Kan hlawkpui dan zawk i han tarlang dawn teh ang.

1. Kristian Hla Bu kan thiam phah : Zaipawl hla ah Kristian Hlabu chhung a mi kan la thiam ngai loh te thlan a ni thin hian KHB kan thiam hnem phah a kan hlawkpui, Ka hriattheih chin ah heng; KHB No. 154 "Lungngaih ni leh lawmlai niah hian", KHB No.369 "Hotu pakhat chu damna kawng zawt tura" , KHB No.472 "Vanram pan hlim te zai ru" leh KHB No. 53 ""Khita van mi thianhlim nen khian" tih hla, hla la larsilo tha tak tak te kan thiam phah.

2. Conductor kan inchherna hmanrua a ni : Group Zaipawl kan intihsiaka Conductor te hi Kohhran Zaipawl Conductor tha tak ni zuita an awm nual mai. Hei hian kan Group Zaipawl kan intihsiak hi kan hlawkpui tih a tilang thei awm e. Kumin a Group hrang hrang Conductor te phei kha chu kum kalta zawng zawng a kan Group Conductor te aiin an tha lehzual niin a hriat. Hma kan sawn zel hi Thil lawmawm tak a ni. 

3. Solfa ah hma min sawn tir : Kan hla zirna ah hian Group tan thahnem kan ngai thei a, kan hla zir phungah a solfa a kan beih nasat leh tih dik kan tumna hian solfa ah member te hma min sawn tir a, hei hian Kohhran Zaipawl ah nghawng neiin hla zir a awl phah viau. Solfa vuak, a kat leh half note te kan ti dik thei em em mai a, a blending leh thu lam ah pawh hma kan sawn na sa.

4. Member min huikhawm tu a  ni : Zaipawl hi mi tlemte tih theih a nih loh avangin member min huikhawm tu ber a ni.

5. Tlangkawmna : Khing kan sawi bak ah pawh khian hlawkpuina kawng hrang hrang kan nei awm e. Engpawhnise, thatlohna pawh a nei thei tho mai. Keini Branch chuan Group Zaipawl Intihsiakna item pakhata kan hmang thin hi kan hlawkpui khawp mai.