*PRESBYTERIAN ZIAK LOH DAN ȚHENKHAT*
Ziak loh dan hi Bial leh Kohhran hrang hranga kan practice a inang vek țhin lova. Presbytery huapa kan practice pawh inanglo a awm nual țhin. A țhen hi chu inkaihhruaina lama ziaka awmte pawh a tel tho ang. Heng ka rawn sawi turte pawh hi hetiangin kan ti ngai lo, chutiang tur chu a ni zawk e kan ti a nih pawhin ka pawm thiam vek tho ang. Sawi belh duh tan sawi belh theih a ni anga, Complaint duh tan Complaint theih a ni bawk ang. Ka lo hriat dan leh ka lo hmuh ve dan ka sawi mai dawn a ni.
1. Inkhawmpuiah emaw Committee-ah emaw laklawh thuta Moderator/Chairman-in a hun a hmang thei lo a nih chuan a hma chiaha mi khan Moderator/Chairman ai a awh mai țhin.
2. Bial Inkhawmpui hi Bialtu Pastor tel lovin kan nei ngai lova, a tel thei lo a nih chuan Synod lama kan hotuten Bialtu Pastor aiawh tur mi an tir mai țhin.
3. Inkhawmpuia Mual inkhawmah Moderator/Chairman ten min hruai țhin.
4. Inkhawmpuiah Moderator/Chairman inthlak laiin Palaiten dingin kan hriatpui țhin. Rorel zawha minute tawpa Moderator/ Chairman ten hming an sign laiin Palaite kan ding țhin.
5. Inkhawmpuiah Palaiten Agenda kan sawi hmain, Agenda neituten an sawi hawng hmasa țhin.
6. Inkhawmpui rorelah Țan hmain kan zai ngai lo. Țan hnua kan zai pawhin khuang hnih hla kan sa ngai lo.
7. Inkhawmpuiah Țantuten Pulpit-ah hun an hmang țhin.
8. Kohhran Committee-ah ban pharin ro kan rel ngai lo.
9. Phone hmang ringawtin kan Committee ngai lo.
10. Kohhran Committee-ah kan la kalpui ngai loh thil thar kan relin member pakhat a țang tlat a nih chuan a tlangpuiin thu kan ti tlu lui hram ngai lo. Inlungrualna kan ngaih pawimawh vang a ni țhin.
11. Kohhran Pathian biak inkhawm(Worship Service) hi nemngheh miten an hruai țhin.
12. Kohhran Pathian Biak Inkhawm(Worship Service)-ah țan hnua hla kan sakin țhu chungin hla kan sa ngai lova, ding chungin i lo sa ang u kan ti kher ngai lova, Pathian kan biak ho nan emaw Pathian chawimawi nan Hla number chumi kha mi chu i lo sa ang u kan ti mai țhin.
13. Inkhawm hruaitute chu mipui lo welcome hman ngei turin kan kal hma țhin.
14. Thawhlawm hi Pathian biakna thil pawimawhah kan ngai a. Thil pawimawh tak a nih avangin thawhlawm hlan laiin a tlangpuiin kan ding țhin.
15. Worship Service-a chanvo changtuten an hun an hmang thei dawn lo a nih chuan anmahni thuin midang an pe ngai lo. Kohhran Committee ten kan sawiho zel țhin.
16. Inkhawmpui bikah Lalpa zanriah Sakramen hi Church Court inkhawmpuiah țheh țhin a ni a. Fellowship inkhawmpuiah chuan țheh lo tura ngaih a ni țhin.
17. Tualchhung Kohhrana rawngbawltu ni lo kohhran pawn lam leh bial pawn lam mi rawih dawnin Bialtu Pastor hriatpui ngei a ngai țhin.
18. Ruang chhuak tur an awmin Upa remchang apiangin țawngțaiin kan thlah țhin a. Hla erawh kan sa ngai lo.
19. Thlan nghahniah Upa pakhat tal Khawharinah awm hi a mawi a, kan awm deuh ngei țhin.
20. Inneih inkhawmah hmeichhiain mipa zungbun kan bun tir ve ngai lo.
21. Kan țawngțaiin Pa Pathian kan address-a, Isua hmingin kan dil țhin.
22. Biak inah bawp khawkherh leh nghenchhan hlam duaiin kan țhu ngai lo.
23. Seminar-ah Pulpit ațangin Paper kan present ngai lo. Seminar kan neihin a tlangpuiin hall-ah kan nei țhin.
24. Inkhawmpuiah puipate țhutna awmsa bakah Moderator/Chairman kal chhuak/Elect țhutna kan siam țhin. Puipate țhutna awmsa rual putin an țhutna kan dah ngai lova, Secretary hnung lam sir deuhah kan dah țhin.
25. Worship Service-a thupuan hi Secretary thupuan a ni mai lova "Kohhran Thupuan" kan ti țhin.
26. Inkhawmpuiah Agenda sawi hawngtuin "kan agenda min pass pui ngei turin kan ngen a che u" tih hi kan sawi tel ngai lo.
25. Kan țawngkam pangngaiah chuan Bial Chairman/ Bial Secretary kan ti mai țhin. Bial Standing Committee Chairman/Secretary kan ti kher ngai lo.
26. Kohhran Chairman/Bial Chairman/Moderator te hi Pastor/ Upa Senior te chanah kan dah deuh țhin.
27. Biak Inah mipa leh hmeichhia kan ințhutpawlh ngai lova, chhungkuaa țhu khawm duh an awm erawh chuan kan khap lova an țhu tlang mai țhin. Amaherawh hmeichhe lamah emaw mipa lamah emaw țhutna awl a awm tawh lohva lehlam ala awl duai si chuan loh theih lohva ințhut pawlh a țul chang chu a awm țhin.
28. Kan țawngțai lai leh Malsawmna sawi laiin kan maimitchhing țhin.
29. Inkhawm hruaitu hi meeting chairman kan ti ngai lo. Meeting kan nih loh avangin inkhawm hruaitu kan ti mai țhin.
30. Pastor induction-ah Pastor thar awm tura aia naupangin an induct ngai lo.
31. Malsawm țawngțai kan ti ngai lova, "malsawmna" kan ti mai țhin.
32. Worship Service-ah hnehna puangin kan au rual vak vak ngai lo.
33. Inkhawm hruaitute leh Thuhriltuten mahni awm hmun kalsanin hmun dangah kan lam zuai zuai ngai lo.
34. Thuhriltu hliahin pangpar kan khawi ngai lo.
35. Inkhawm chhungin Biak Inah thil kan ei ngai lo.
36. Hnatlan nikhuain Biak In chhungah thil kan ei ngai lo.
37.Kohhran programme-a Malsawmna sawi hi nemngheh mite tih turah kan ngai deuh a, intheisem vak chiah ngaih a ni ngai lo. Kum lama Senior zawkte chanah ngaih deuh țhin a ni.
38. Call to Worship-ah "Lalpan a thu mawlsawm rawh se" tih hi inkhawm hruaina buah a awm lo.
39. Hlabu en chunga hla sak hi kan kaldan phung pangngai a ni. Lamte erawh chuan hlabu an en kher ngai lo. Solfa hla bikah phei chuan hlabu lek chhuah ngei hi a mawi, Solfa lamah leh a thu lam dikah hmasawnna a ni. Hla bu en ngur ngur tur tihna erawh a ni chuang lo.
40. Inkhawmpui thlengtuten inkhawmpui Palaite tana Biak Inhnuai Hall-a tlai lama chaw ei tur an lo buatsaih a nih chuan "Ruai" kan ti ngai lova, "Zanriah" kan ti mai țhin. Pathianni-ah ngat phei chuan Ruai kan țheh ngai lova, zanriah erawh kan ei țhin.
41. Inkhawmpuiah Badge kan siam țhin.
42. Țantu leh Thuhriltuten Pathian thu kan chhiar dawnin,"Bible chang i lo chhiar ang u," kan ti ngai lova,"Pathian thu thianghlim i lo ngaithla ang u," kan ti mai țhin.
43. Inkhawm hruaitu erawh chuan, "Pathian chibai i buk ang u" a tih zawhah Pathian thu a chhiar a. A chhiar zawhah "Lalpan a thu malsawm rawhse" kan ti ngai lo. "Amen" an tih loh pawhin an țawngțai zui nghal mai țhin.
44. Call to Worship țawngțaiah a chham theih zawng zawng kan chham duah ngai lo. Tawifel takin inkhawm kan hlan mai țhin. Țawngțaipui ngai zawng zawng leh Khawtlang leh ram chhunga thil thlengte chham tel vekna hun a ni lo.
45. Chhiatna te a nih loh chuan Kohhran inkhawm laiin Kohhran memberte chuan hmun dangah Programme lian tham kan huaihawt ngai lo.
46. Zing țawngțai inkhawm hruaituten inkhawm hruaitu țhutna ațangin an hruai ngai lo.
47. Biak in bul hnaiah mitthi/khawhar an awmin inkhawm laiin kan zai ngai lova, inkhawm ban veleh kan zai mai țhin.
48. Nupa inthihsante RC&RL pek an ngai lo.
49. Inkhawm hruaituin hla sak tur a sawiin a number bakah chang khat tal kan chhiar chhuak țhin.
50. Nilai zan leh Beihrual thupui hawngtu țhenkhat chuan thupui an hawnin an țawngțai țhin.
52. Kohhran tinah a tlangpuiin Upa bial kan siam țhin.
53. Chanchin Țha hril hi "Kohhran hnapui" kan ti țhin.
54. Lalpa Zanriah Sakramen kan semin YMA thingpui sem ang maiin kan in pass chhawng mai mai ngai lo. A semtute ngeiin kan pe țhin.
55. Lalpa Zanriah Sakramen Uain bangnawi reng reng Upa ten kan ti ral vek țhin. Inkhawm thei lo leh tar chak lote an inah kan sem ve a nih loh chuan Biak in pawn lam a thleng ngai lo.
56. Lalpa Zanriah Sakramen siam leh senghawi hi nemngheh mite tih tur a ni.
57. Lalpa zanriah Sakramen hunah thawhlawm kan khawn țhin.
58. Baptisma Sakramen hunah thawhlawm kan khawn ngai lo.
59. Biak Inah Fellowship programme kan hmang ngai lo. Fellowship chu Hall lamah kan hmang zawk țhin.
60. Biak Inah zaikhawm leh hla zir kan ti ngai lo.
61. Inneih Programme-ah țan hmain kan zai ngai lo.
62. Kohhran ni pawimawh inkhawmah Responsive reading kan chhiar rual țhin.
63. Special thil tak a nih loh chuan Committee bilin Kohhran Choka behchhanin Chaw kan eikhawm mai mai ngai lo.
64. Committee-ah pha ni silo, engmah sawi lova kal lo ringawt te chu minute buah kan ziak lang ngai lo.
65. Thuhriltuten thuhril uar vangin Pulpit kan chum bur bur ngai lo. Thil serh chum bur bur hi kan kalphung a ni lo.
66. Kohhran hruaitute hriatpui lovin Biak in chhung bungrua hun sawnin Kohhran property kan la chhuak ngai lo.
67. Kohhran rorelah kan țanna lam a tlang lo a nih pawhin lawm takin kan pawm ve leh mai țhin. A lo țha vak lo a nih chuan inkhawmpui/Committee bawkin kan rel țha leh mai țhin.
68. Kohhran mipui khai rual thei ang berin ro kan rel țhin.
69. Pathian ram thawhlawm kan țhen sawm dan kan hman mek chu 5:3:2 a ni.
70. Inkaihhruaina kan neih hi a theih ang anga zawm ngei kan tum țhin.
71. Proper Channel ngai pawimawh țhin kohhran kan ni.
72. Synod inkhawmpuiah Palaite in lamah thlenin kan la siam sak țhin. Tun hnuah erawh chuan kan inkhawmpui tenau deuhah chuan inlama mikhual inthlen tir kan uar ta vak lo.
73. Pulpit hnung bangah Banner bak kan tar chuai ngai lo.
74. Inkhawmpui nikhua pawh nise maicham chungah lawmman kan hung tuar ngai lo. Lawmman dahna tur dawhkan tê kan hung mai țhin.
75. Bialah Pastor thar an lo luh niin alo dawngsawng tur Bial Standing Committee-in kan ruat țhin.
76. Inkhawm țan hun apiang hi zan lamah chuan a tlangpuiin Committee țan hunah kan hmang țhin.
77. Hnatlang a nih loh chuan Biak In chhung hi titi nan leh țhian kawm nan kan hmang ngai lo.
78. Worship service tibuai zawngin mitthi kan vui ngai lo. Kan lo vui a nih pawhin Presbyterian kalphung lovin kan kal tihna a ni ang. Kan kalphung chu kohhran inkhawm tibuai lova vui hi ala ni mek. Worship Service chu Biak Inah hman țhin a ni.
79. Biak inah kan luh veleh kan țawngțai țhin.
80. Kan inkhawmin Bible leh Kristian hlabu ken ngei turah kan ngai.
81. Kan inkhawmin Smart tak leh fai tak a inchei turah kan ngai țhin.
82. Minister leh Kohhran Upa mikhual kan neih chuan kan lo welcome-a introduction kan pe țhin.
83. Revival Camping kan neih dawn reng rengin Kohhran Committee-in uluk tak leh khunkhan takin kan ngaihtuah țhin.
84. Pathiannia zin chhuah leh zan riaka kal chhuahte, zinna ațanga haw te hi kan ti ngai lo.
85. Kohhran memberte chuan Kohhran Committee-ah rawtna kan thlen thei a. Mahse, Bial, Presbytery, Synod leh General Assembly-ah te chuan mimalin rawtna kan thlen ngai lo. Amaherawh chu Synod Committee țhenkhatah chuan rawt tur nei tana rawtna theh luh theih thu hi chu Synod-in a țul chang chuan a rel țhin. Entirnan, Nupa chungchang dan ențhat hunah te leh țul dangah te.
85. Pathian ram thawhlawm thawh dan tur chungchang hi dan lamah ziakin awm lo mahse kan thawh tam dan tur indawt chu hei hi a ni. Pathian ram, Ramthar, Tualchhung a ni(5:3:2).
86. Inkhawmpui leh Committee rorel-ah Junior zawk ten Senior zawkte kan din khalh zung zung ngai lem lo.
87. Kohhran Upa thlanah Bialtu Pastor chu a bial chhung a nih chuan inthlanpuitu-ah tel ve ngei tura ngaih a ni. Station Kohhranah erawh chuan inthlanpuitu atan Pastor dah tello an awm bawk țhin.
88. Sunday School zirlaiah leh Nilai zan inkhawm thupui zirah sawihona kan neih țhin bakah leh zawhnate kan zawt bawk țhin.
90. Presbyterian Kohhran memberte hi chu maksak tak tak leh Khawvel mite lam dan ang maiin Biak Inah kan lam ngai lo. Taksa chetna nei te chu hriatthiamna zau tak kan nei. Kan lam a nih chuan vei lama lamkual hi kan tih dan a ni țhin.
100. Inneihnaah Upa te kan țawngțaiin innei thar/nupa tuak thar te tan fanau malsawmna kan dil sak ngei țhin.
101. Committee leh Inkhawmpui rorelah țawngkam dengkhawng leh mawi lo hman loh hram kan tum țhin. Țawngkam zahawm leh ngaihthlak nuam hmang țhin Kohhran kan ni.
102. Kohhran pawl dangte hi Vanram kai ve lo tur angin kan sawi ve ngai lo.
103. Kohhran Aw hi Pathian Aw a ni ti țhin Kohhran kan ni.
